RAHA YENYE MAUMIVU - 3

Simulizi : Raha Yenye Maumivu
Sehemu Ya Tatu (3)

ILIPOISHIA:
Baada ya kusema yale Eliza alianza kulia kitu kilichofanya Gift anyanyuke kitandani na kwenda kumbembeleza.
“Pole sana rafiki yangu.”
“Gift inauma umasikini huu utaendelea kutudhalilisha mpaka lini?”
“Najua nakuahidi kukusaidia rafiki yangu najua mimi nimeumia lakini wewe umeumia mara mbili kwa vile hukufanya kwa ridhaa yako tofauti na mimi.”
Gift alisahau yake na kumtia moyo Eliza aliyekuwa akilia kwa majuto.
SASA ENDELEA…
***************
Ilikuwa siku ya jumapili Gift akiwa na shoga yake ambaye shuleni wapambe waliwabatika kama wake wenza kwa ajili ya kutembea na mwanaume mmoja. Kwa vile msimamo wao ulikuwa mmoja wa kumkomoa Kanuth hilo halikuwashtua walikuwa na siri yao nzito.
Wakiwa wanajisomea chini ya mti kwa mbali lilisimama gari moja la kifahari aina ya Lange lover Vogue ya rangi ya nyeusi. Hawakuijali baada ya kuisifia tu kuwa gari zuri waliendelea na masomo yao. Sauti ya juu iliyokuwa ikimwita Gift ilimfabya aache kusoma na kuangalia ni nani.
"Gift mgeni wako huyo," Eliza alisema huku alimuangalia vizuri mgeni wa kiume ambaye alikuwa mgeni machoni mwake.
Kila alivyokuwa akisogea naye alimwangalia vizuri, alikuwa kijana mmoja mtanashati aliyekuwa kwenye suti nzito alijiuza ni nani. Macho yalipotulia alimkumbuka lakini jina alikuwa amemsahau.
Bila kijielewa alijikuta ametupa vitabu na kukimbia kumpokea kwa kumkumbatia.
"Oooh! Kaka karibu."
"Asante, upo sawa?"
"Kama chuma si unaniona!"
"Vizuri, mrembo hujambo?" alimgeukia Eliza aliyekuwa bado amepigwa butwaa.
"Sijambo shemeji."
"Eliza tabia gani mtu hujatambulishwa unapayuka."
"Samahani shoga...karibu kaka..nani sijui?"
"Gift atakutambulisha."
"Huwezi amini jina lako nimelisahau.. hebu ngoja nikumbuke Mr listen kama sikosei..oooh nimekumbuka talk to me."
"Ngoja nikukumbushe naitwa Niambie kwa nini umelisahau jina langu wakati hata kadi nilikupa."
"Oooh nimekumbuka Tell me why....Oooh karibu sana kaka tell me why ni kweli nilikuwa na kadi ambayo nilimpa mama ili siku nitayotoka tukualike tujumuike pamoja kwa chakula cha usiku mama alikuwa na hamu ya kukuona.
"Lakini aliondoka siku moja baada ya mimi kutoka hospitali na kupanga tutakualika, kibaya hata kadi yako aliondoka nayo na mimi sikuwa nimeiandika pembeni. Nilikuwa na hamu ya kukuona lakini ndivyo hivyo ilibidi namsubiri mpaka mama arudi."
"Mmh! Tuachane na hayo, vipi hali yako unajua sikujisikia vizuri kutokujua maendeleo yako kibaya zaidi msomi ambaye ni tegemeo la taifa," Tell me alisema huku akichanua tabasamu mwanana.
"Tegemeo wapi kila kukicha tunanyanyapaliwa na serikali."
"Lakini si mambo yametulia."
"Sawa yametulia lakini jasho limetutoka kila siku mpaka mishipa ya shingo itusimame. Wao mbona huwa hawaandamani kuongezana posho wamesahau na wao wamesoma bure lakini wenzao ndio watukamue."
"Hata nyinyi mkifika juu mtakuwa hivyohivyo, wangapi walisema lakini wamepata wamesahau ahadi zao njaa mbaya ukiwa na njaa utatoa ahadi za ajabu hata kuvuta meli kwa mkono ili upate chakula ukishiba unawageuka kwa kuwauliza ni nani mwenye uwezo wa kuvuta meli kwa mkono wewe atakuwa wa pili."
"Mr Tell me why mbona unatetea au una mpango wa kugombania Ubunge?"
"Siku zote kweli utafutiwa sababu ili kuonekana si kweli."
"Umeshinda, tuachane na hayo karibu kazini kwetu hapa ndipo tunapo itafuta sembe."
"Ninashukuru huwezi kuamini kukaa kwangu kote jijini sijawahi kufika chuoni hapa."
"Muongo mtu maarufu kama wewe usifike sehemu kama hii."
"Gift yaweza kuwa kweli pengine hana shida napo aje afanye nini?" Eliza alimuunga mkono Mr Tell me.
"Kwanza mimi si maarufu kama anavyosema, ningekuwa maarufu angepoteza kadi yangu na kushindwa kunipata."
"Mmh! Tell me imekuwa sababu..basi nisamehe leo simu ninayo najua sasa kesi itaisha."
"Kuwa na simu siyo sababu muhimu mawasiliano."
"Sasa utanichoka usijesema karaha au kumuudhi wifi."
"Ni hapo nitakapokuwa naye....Sasa Gift nina imani kidogo moyo wangu utaridhika au kutulia baada ya kupata kujua hali yako. Nimefarijika sana kukuta mzima wa afya tena ukibukua."
"Hata mimi nimefurahi huwezi kuamini siri ipo moyoni mwangu ipo siku nitakwambia. Tell me why kila dakika unanifanya niwe mwanafunzi wako wa kujifunza tabia za watu na kufuta dhana kuwa baadhi ya viumbe si wabaya ila kiumbe mmoja ndiye anayeweza kutia doa na kusababisha kuona wote ni wabaya....wewe ni mfano wa kuigwa."
"Kwa nini unasema hivyo?"
"Ni vigumu kuamini japo ni muda mrefu nashangaa kuona kama nilikuwa nawe siku zote na kujiona mpweke pale utakapo niaga na kujuta kwa nini nimekufahamu."
"Gift una maana gani?" Maneno ya Gift yalimchanganya kidogo Tell me.
"Ni vigumu kuwa wakili wa moyo wako, hasa sisi wanawake pale moyo unapoingia gerezani pasipo kosa wakati mtetezi yupo ambaye ni muoga kuutetea moyo ambao huteseka bila kosa."
"Ninaweza kuwa nimekuelewa lakini huenda vilevile sijakuelewa hebu niweke wazi una maana gani kama sivyo nifikiliavyo?" Maneno ya mafumbo yalizidi kumwweka njia panda.
"Sio siri kila muda kila dakika kila nikikufikiria nakosa jibu kuwa wewe ni kiumbe wa aina gani hata mama yangu mzazi alikusifia kwa yote uliyonitendea nashindwa nikilipe nini...ili isiweze kukupoteza ili nami uuone ukarimu wangu."
"Sihitaji malipo yoyote kutoka kwako...ilikuwa ni wajibu wangu kama mwanadamu kuonyesha ubinaadamu hasa pale unaposababisha maumivu kwa mwenzio japo ilikuwa bahati mbaya."
"Lakini elewa Tell me why siku zote hesabu huanzia moja, lakini kwa upande wangu naomba ifike kumi na moja nina imani unaijua hesabu hii hutumika hasa kanisani, moja na moja huwa moja kibinaadamu huwa kumi na moja naomba hesabu yetu iende kikanisa ili tupate moja."
"Nimekuelewa kuliko ulivyozungumza nipe muda."
"Umenielewa nini Tell me why?"
"Nina imani mzigo ulionipa umeufunga hukutaka kila mtu aujue kwa mimi muungwana nimekuelewa kwa hiyo wacha nikauangalie kama unapendeza hauna kipingamizi."
"Nitafurahi kama kile nilichokiota mchana kinakuwa kweli nimeamini unaweza kuota huku ukiwa macho."
"Umeota nini tena Gift?"
"Nimeota moja na moja ni moja wala si mbili wala kumi na moja."
"Mmmh kweli wewe msomi unayeongea kwa mifano isiyoonekana kwa macho wala kwa akili nyepesi bali kwa yule aliyezama chini ya maji ndiye hugusa mchanga mweupe."
"Hakika kila asimamae kwa ajili ya nafsi yake huiokoa nafsi yake."
Tell me why alimuaga Gift ambaye alimsindikiza hadi kwenye gari lake aliwaaga na kuondoka huku akimuacha Gift kwenye mtihani mzito wa moyo wake na kujiuliza ni kweli turufu aliyoitupa ni kubwa kuliko ya mpinzani wake au ndio imemezwa na kubwa zaidi kama samaki mdogo kuliwa na mkubwa.

Huo ndio ukawa mwanzo wa mahusiano ya karibu kati ya Tell me why na Gift. Tabia ya Gift ya msimamo na kupenda kujua mambo na muda wote alipenda kuwa muwazi. Ilimvutia Tell me why na kumuona ni msichana anayefaa kumuoa. Alimsubiri amalize masomo yake ili waweze kuwa karibu zaidi, kwa vile muda uliokuwa umebaki ni wa mtihani wa mwisho.
Alipomaliza tu mtihani alijiachia na muda wote kuwa karibu ya Tell me why.
Tabia za Gift kila dakika zilimvutia Tell me na kuamini kabisa mwanamke wa ndoto yake ni Gift. Siku moja Tell me why alimueleza ukweli Gift juu ya kuvutiwa kwake na tabia zake na kila alichokitaka kwake alikuwa nacho na zaidi.
Alimjulisha kuwa anataka kukamilisha ile hesabu ya moja na moja.
Gift aliona kama miujiza ile ndoto yake inakaribia kutimia alimuomba Mungu itimie kweli. Tell me alimuomba ndoa yake ifanyike upesi upesi kwa kuwa alikuwa na shughuli nyingi.
Kwa kuwa mama yake alikuwa nje kikazi Gift alimuomba waiahirishe mpaka hapo atakuapo rudi mama yake, kauli ile ilimfanya Tell me ahoji..
"Ina maana mzazi wako wa kiume amekwisha kufa?"
"Hapana."
"Kwani yeye hawezi kusimamia ndoa yako?"
"Anaweza lakini aliachana na mama kila mtu yupo kivyake."
"Hata kama wapo kivyao, lakini baba yako bado ana nguvu ya kusimamia ndoa yako."
"Mama lazima atakasirika ikiwezekana hata kuivunja ndoa yetu."
"Kwani akivunja wanawake wamekwisha?"
"Sivyo hivyo, nitakuwa nimeathirika mimi."
"Kauli yako imenifanya nihoji ni nani aliyevunja ndoa ya wazazi wako wawili?"
"Ni mama."
"Nilijua, kwa nini?"
"Toka alipopata pesa kwenye biashara zake na baba kumwekea mipaka hapo ndipo alipo lazimisha talaka. Japo baba alikuwa hapendi kumwacha, mama alimpeleka baba mahakamani kumdai talaka ambayo ilitolewa mbele ya Hakimu."
"Baba yako ana kazi gani?"
"Ni mtumishi wa umma aliyesitaafu."
"Ana shughuli gani?"
"Ana mashine ya kusagia unga na Heace mbili."
"Unamuheshimu baba yako?"
"Tena sana, kitendo cha mama cha kumwacha baba na kumliza mzee mzima mahakamani akimlilia mama, kiliniumiza moyo na baba aliapa hataoa maishani mwake mpaka anakufa. Japo mama yeye anapenda ujana humchukua mwanaume yoyote amtakaye kwa gharama yoyote. Kitu kinachonitisha na kama hivyo amezaa na kijana mmoja Arusha ambaye hamjui jina wala sura hamkumbuki japo amesema mdogo wangu anafanana na baba yake copy right, unajua nini Tell me kwa mfano.
"Wewe ni kijana bado unadai vilevile una matamanio ya kimwili na mama yangu ni mtu mzima anayekwenda na wakati kwa bahati mbaya wewe nawe mwanadamu unaweza kukutana naye bila kumjua kama mkweo katika biashara zenu na kumchombeza unarudi nyumbani nakutambulisha kuwa huyu ndiyo mkweo sijui hapo kutakuwa na picha gani?"
"Itakuwa mbaya tutashindwa kutazamana usoni tumuombe Mungu ayaepushe haya."
"Ndiyo maana nikaitafuta hesabu ya moja kwa moja yenye jibu ya moja yaani ndoa ya watu wawili huzaa mwili mmoja."
"Naomba twende kwa baba yako mpe heshima kama inavyo sitahili."
"Wacha niwasiliane na mama kama ataweza kuwahi ili wajumuike wazazi wangu wote."
"Itakuwa vizuri basi tuonane baadaye kujua umefikia wapi...sitaki uifute shauku ya moyo wangu, elewa wewe ndiye uliye ushawishi naogopa usije uudhi."
Waliagana Tell me why na Gift, jioni ya siku ile aliwasiliana na mama yake ambaye alimjulisha atachelewa kurudi na kuomba radhi kwa kuwa tayari kulipa gharama yote ya harusi. Alimuomba baba yake awe msimamizi wake, lakini mama yake alikataa katakata kwa kusema gharama za maisha ya Gift anazijua yeye umiliki wa Gift uliishia pale walipoachana tu siku alipotoa talaka mahakamani.
Gift alijua kama atamweleza Tell me why, yale aliyoongea na mama yake mume atamkosa. Aliamua kutunga uongo pale alipokutana na Tell me why kwa kumwambia kuwa mama yake amekubali baba yake awe msimamizi wake. Kauli ile ilimfanya Tell me why afurahi sana na kupanga siku ya pili kwenda kwa baba yake mzee Edgar Bilikila
Siku ya pili waliongozana hadi kwa mzee Bilikila ambako walipokelewa kwa furaha na bashasha. Gift baada ya kumtambulisha mchumba wake alieleza sababu kubwa iliyowapeleka pale. Mzee Bilikila alishangaa na kuhoji.
“Leo mtoto wa mama umekuja mimi baba yako maskini nikuoze na mama yako je?"
"Mama hayuko ila amesema wewe uendelee na shughuli zote bado mizunguko yake haijaisha."
"Sipendi kuongea mengi kwa vile wewe mwanangu upo peke yako nilikuwa na haki ya kukataa. Lakini nitakuwa sikukutendea haki, kingine ni mtoto uliyeonyesha mapenzi ya dhati kwa mimi baba yako pamoja na mama yako kukukataza."
"Baba wewe ndiye baba yangu sina mwingine, baba huwa najisikia uchungu kwa kitendo cha mama cha kukuacha kwa ajili ya pesa namuomba Mungu nisifuate nyayo za mama ili niwe mtiifu kwa mume wangu nimpende kwa shida na raha kwa kuwa fedha ni matokeo fedha zinaweza kukupa sifa pia hizohizo zikakudhalilisha."
"Ni kweli mwanangu kauli yako inaonyesha ni kiasi gani ulivyopevuka na pesa si msingi wa maisha pale unapozitumia vibaya...mwanangu ninakupa baraka zote ili uolewe na mumeo. Na wewe baba nakuomba uwe mume mwema lakini uwe makini kwa hawa wanawake japo mwanangu sipendi awe na tabia kama za mama yake."
"Nashukuru kwa nasaha zako baba namuomba Mungu ampe mke wangu mtalajiwa akili na upendo ili ndoa yetu itenganishwe na kifo."
"Amen."
Baada ya kupata idhini ya kumuoa Gift Tell me alirudi mjini kufanya taratibu zote za ndoa ambazo nazo zilikwenda kwa haraka sana. Ndani ya wiki mbili ndoa ilifungwa rasmi na Gift kuwa mke wa Tell me why.
Gift alikuwa na siri moyoni juu ya kauli ya mama yake alijua akirudi lazima kutakuwa na matatizo hata kufikia hatua ya kutoitambua ndoa yao. Lakini alijipanga kwa ajili ya kukabiliana na mama yake na kuwa tayari kwa lolote, wala hakumtaarifu kuwa ameisha funga ndoa.
***
Tell me why alianza maisha kwa mafanikio makubwa na kujilaumu kwa kuchelewa kuoa, lakini alijua kama angewahi kuoa asingepata mwanamke kama Gift alijua ni zawadi aliyopewa na Mungu. Ndani ya wiki mbili alikuwa tayari ameisha cheka na nyavu, mwezi ulikatika Gift akiwa mjamzito. Mimba nayo ilimpenda alizidi kunawili na kupendeza. Wakiwa wamekaa sebuleni Gift alimtania Tell me.
"Mmh sikuwezi."
"Kwa vipi mpenzi?"
"Yaani kugusa tu bao.”
"Siku zote biashara mapema na mshambuliaji mzuri si mpiga cheka bali mpiga mabao.”
"Siyo unizalishe kama mlea kambi ya yatima."
"Wanne wanatosha."
"Mmh! Wengi wawili tu."
"Lazima wawe wanne yaani wawili kwenu na wawili kwetu."
"Mmh, haya kazi kwako kulima kwa bidii."
Mara simu ililia wote walishtuka kwa uchovu Gift aliichukua na kuongeam ilikuwa inatoka kwa mama yake.

"Haloo mama Shikamoo."
“Marahaba.”
“Leo umetukumbuka, za siku?”
"Nzuri vipi hali yako?"
"Mimi sijambo sijui wewe?"
"Kwa kweli mimi mzima wa afya japo mambo yangu ni mengi lakini nakuja mara moja wiki ijayo kusimamia harusi ili nirudi kwenye shughuli zangu."
"Hamna tatizo mama."
Gift alimficha mama kuwa amekwisha olewa na sasa hivi ni mke wa mtu. Aliogopa malumbano ya ndani ya simu, vile vile mama yake angeweza kughaili kuja Tanzania. Aliamua amuache ili aje ajionee mwenyewe mkwewe ambaye anashida naye ya kumuona kama mwanga kwa kipofu.
Baada ya mazungumzo Gift alimgeukia mumewe.
"Honey mama anakuja wiki ijayo."
"Oooh vizuri hata mimi nina hamu naye."
WIKI MOJA BAADAYE
Katika uwanja wa ndege wa kimataifa wa mwalimu J.K.Nyerere majira ya saa nne Gift akiwa na mumewe waliwasiri uwanja pake kumsubiri mama Gift ambaye alikuwa akiwasiri siku ile. Waliwahi nusu saa kabla ndege ya shirika la ndege la Swiss air kuwasiri. Wakiwa wametulia sehemu ya kupokelewa wageni tangazo liliwajulisha kuwa wakati wowote ndege ya shirika la Swiss air itawasiri.
Wote waliokuja kupokea wageni wao walikaa tayari kuwapokea wageni wao. Gift na mumewe Tell me why nao walijitayalisha kumpokea mgeni. Saa nne juu ya alama ndege iliwasiri na abiria walianza kushuka mmoja mmoja. Kila aliyekuja kupokea mgeni wake alipepesa macho ili amuone.
Gift alipepesa macho kwenye foleni ya wageni waliokuwa wakitoka kwenye msafara mmoja. Mara alimuona mama yake alijikuta akipiga ukelele
“Mamaaa.”
"Wawooooo mwanangu."
Mama yake na yeye alijikuta akiachia kigari cha mizigo na kumkumbatia mwanaye.
"Jamani mwanangu."
Wakiwa wamekumbatiana Tell me why alikuwa pembeni akiangalia furaha ya mama na mtoto, baada ya kuachiana Gift alimtambulisha mumewe kwa mama yake.
"Mama kutana na mkweo ambaye ulikuwa na hamu ya kumuona lakini sasa ni mume wangu."
"Oooh baba nimefurahi kukuona," alisema huku akijitoa kwa Gift na kumkumbatia.
"Hata mimi."
Waliongozana hadi kwenye gari na kurudi mjini, wakiwa njiani mama Gift alitaka kujua ile hali ya mwanaye kuwa katika ujauzito bila kufunga ndoa.
"Haya mama tutayaongelea nyumbani humu sio pahala pake."
Mama Gift hakutaka kuongeza neno akilini mwake alijua mwanaye bado hajafunga ndoa na haikuwa vizuri mtu akiwa akisubiri ndoa akubali kubeba mimba.
Baada ya kufika nyumbani walimwacha mama yao ajipumzishe ili jioni wapate muda wa kuongea naye. Kwa upande wa mama Gift alikuwa amempotea kabisa Tell me why kwa kuwa hata kimawazo asingeamini mchoma nyama kuwa tajiri mkubwa namna ile.
Hata Tell me naye hakumtilia maanani mama Gift siku waliyokutana kwa mara ya kwanza kwa hiyo sura yake haikuwa kwenye kumbukumbu kabisa alimwona mtu kama mtu. Na kwa muda ule alimchukulia kama mama mkwe.
Jioni walikwenda kwa mama Gift kwa mazungumzo ya safari na mipangilio aliyokuja nayo mama Gift. Ilikuwa baada ya chakula cha usiku majira ya saa tatu na nusu wakiwa sebuleni Mama Gift alitaka kujua mpaka sasa matayalisho ya harusi yamefikia wapi.
Tell me alishtuka kusikia kauli ile ilibidi amgeukie Gift kwa kumuuliza kwa macho kuwa mama ana maana gani.
"Mama sina budi kwanza nikuombe msamaha kwa kukiuka kauli yako, pili kusema uongo kwa baba nilikuwa sina jinsi. Ukweli nimeisha olewa huu ni mwezi wa pili na sasa hivi mimi ni mzazi mtarajiwa."
"Atiii..unasemaje Gift umeolewa kwa idhini ya nani?"
"Ya baba."
"Nilikwambiaje?"
"Kumbuka mimi ni mtoto wa pande mbili na mwenye madaraka ni baba yangu siwezi kumdharau baba yangu bila yeye mimi nisingekuwepo," Gift alijibu kwa kujiamini.
"Baba yako ni nani mbona mdogo wako amepatikana bila baba yako hata wewe ungepatikana bila yeye. Kwanza nilifanya makosa kuolewa na mtu maskini kama yule."
"Mama bila baba nisingezaliwa mimi, angezaliwa mwingine kaa ukielewa namheshimu baba na nitaendelea kumheshimu sioni kosa lake kwako zaidi ya kumdhalilisha kwa umasikini wake."
"Gift unanivunjia adabu mbele ya mumeo lakini amini ndoa mliyofunga ni batili mimi siitambui."
"Kama huitambui sio juu yako mimi sasa hivi ni mke wa mtu na baba yangu ndiye msimamizi mkuu."
"Na huyo baba yako atanitambua atatoaje idhini anajua gharama za malezi yako?"
"Hakushindwa bali ulining'ang'ania," Gift alimpasulia mama yake.
"Gift leo umenigeuka?"
"Kwa mtindo huo sipo pamoja nawe," Tell me aliyekuwa kimya ilibidi aingilie kati.
"Samahanini japo sijui kwa undani, sidhani kama mmeachana ifikie hatua ya kuchukiana kiasi hicho. Siku zote kiunganisho cha familia ni watoto nakuomba mama mkwe tuliza munkari, tumieni ndoa yetu ili kurudisha mahusiano."
"Itakuwa ngumu."
"Hata kama kwako ni ngumu lakini baba yangu nampenda tena kwa taarifa yako kila siku ilikuwa lazima nionane naye mawazo yake ndiyo leo yamenipa muongozo na kuwa mke mwema kwa mume wangu. Kama ningefuata tabia zako siwezi kukaa na mwanaume.
“Mama tabia yako hainifurahishi naogopa kuishi maisha unayoishi ni madhara makubwa wala hayana mafunzo kwetu sisi wanao. Nikikufuata siwezi kujenga nyumba yangu pesa si kitu kama utu wa mtu," Gift alizungumza huku akilia kwa kutoa machungu ya muda mrefu ya tabia ya mama yake.
"Nini kilichopunguka kwangu?" Mama Gift alihoji.
"Hukioni mdogo wangu baba yake ni nani?"
"Baba siyo muhimu, cha muhimu malezi anawazidi hata hao wenye baba."
"Siku akimtaka baba yake utamwambia nini?"
"Gift hujakuwa,wewe huwezi kunihikumu."
"Nikuhukumu kwa lipi zaidi ya kukueleza ukweli, isifikiri nafurahia kitendo cha kumuacha baba roho inaniuma. Umasikini sio sababu ya kumuacha mtu, mangapi baba alikufanyia mpaka ukawa hapo na chanzo chote cha baba kuwa kwenye hali ile ni wewe kwa kumtapeli pesa zake," Gigt kwa uchungu aliamua kumvua nguo mama yake mbele ya mumewe.
"Gift hapa sio wakati wake," Tell me aliingilia kati kwa kuona marumbano yamekuwa makubwa na mwelekeo wake ni mbaya.

ITAENDELEA